基督的門徒

 

台灣基督長老教會教勢統計，目前咱有1270間教會，超過26萬信徒，其中原住民的教會，有525間，信徒有7萬3千多人。每禮拜日咱所有教會使用18種語言敬拜上帝，其中超過10種語言是台灣原住民族各族的族語，上帝賞賜咱台灣有這呢豐富多元的文化及語言，互咱閣卡經驗上帝無比的恩典及疼痛。

長老宗的開創者加爾文，他所寫的聖詩113首「我來朝見祢，救贖我的主」互咱清楚體會他的信仰告白─佇第3節、第5節歌詞按呢告白：祢就是活命，阮對祢生存。除去祢以外，別位無盼望；主祢有應允，所信無空空。求賜阮平安，自在及確信；對祢得氣力，互阮永堅心。」

今日咱讀詩篇第15篇是朝聖者來到聖殿的門口，提出一個問題：什麼人有資格來到上帝的聖殿？其實通過耶穌基督「道成肉體」的「普世救恩」，上帝對世界人類的疼痛並沒任何條件；顛倒是主動提供每一個生命「無盡的恩典及盼望」！詩篇15篇引導咱親近上帝，及上帝建立親密的生命關係，對3方面鼓勵咱成做「基督的門徒」：

 

一、謙卑順服上帝旨意的人

詩篇15:2「就是行為正直，作事公義，對心底講真實的人。」-現代台語譯本

（新標點和合本：就是行為正直、做事公義、心裏說實話的人。）

咱行為正直及公義的前提是因為咱欲行出上帝的旨意。所以親近上帝的唯一條件就是願意聽趁上帝的命令、指示、提醒及要求；親近上帝的唯一目的就是歡喜實踐上帝的旨意。所以每一遍攏提醒自己用謙卑、順服的態度親近上帝，這是咱禮拜、靈修的基本態度及精神。

我時常思念義光教會黃昭堂兄，他是台獨聯盟永遠的主席，總是他來到教會，非常謙卑及上帝建立信仰生命親密結連的關係，常常吟聖詩流目屎，感謝上帝無盡的恩典及疼痛。昭堂兄每遍主日禮拜，認真領受上帝話語及教示，並通過每日生活及生命活出上帝的旨意。2007年義光教會設立25周年特刊，昭堂兄的信仰見證「黃昭堂的懺悔錄」清楚告白他的基督信仰。

 

二、真實用生命歸榮光上帝的人

詩篇15:3-4a：「伊無用嘴舌中傷人；伊無陷害朋友，無四界造謠毀謗厝邊。伊的目睭藐視作歹的人。」-現代台語譯本

（新標點和合本：他不以舌頭讒謗人，不惡待朋友，也不隨夥毀謗鄰里。他眼中藐視匪類。）

上帝賞賜咱人類有身體各種器官，所組成的生命是欲互人看見上帝的榮耀！所以咱的心思意念、生命展現、人際關係、社會生活、國家認同，一切人生的目標就是歡喜用生命歸榮光上帝。親像保羅勉勵講：「所以，恁無論是食是飲，抑是做甚麼，恁著為著榮耀上帝來做。」(林前10:31)

加爾文的一生用生命歸榮光上帝，甚至安息前特別交待千萬呣通為他立墓碑，以免造成別人誤會他一生有偌大成就。若呣是上帝的恩典及權能，他的一生無法度成就任何事，加爾文的人生對出生到死亡攏真實用生命歸榮光上帝，這也是咱每一位長老宗的信徒一生非常重要的信仰課題及使命。

 

三、甘願犧牲受苦祝福別人的人

詩篇15:4b-5：「伊咒誓，雖然家己剋虧嘛無改變。伊錢借人呣是為著利息；伊無收賄賂陷害無辜的人。做此款代誌的人會永遠徛在。」-現代台語譯本

（新標點和合本：他發了誓，雖然自己吃虧也不更改。他不放債取利，不受賄賂以害無辜。行這些事的人必永不動搖。）

基督徒的人生觀及價值觀及一般人最大的沒仝款，就是閣卡看重別人的欠缺及困難，佇真多受苦的生命看著咱關懷的責任及使命！所以甚至自己吃虧猶原甘願歡喜，因為咱啲同擔苦難的時，咱亦做伙享受榮光、平安及喜樂。基督徒上寶貴的信仰見證：愈親像耶穌基督為別人犧牲受苦，咱顛倒經驗—上帝恩典祝福愈加添！

2017年3月前衛出版社出版「高俊明回憶錄─磨難苦杯下的信仰及實踐」，互咱清楚看見高俊明牧師的人生及生命怎樣盡忠學習成做「基督的門徒」。1977年8月16日台灣基督長老教會發表「人權宣言」，面對當時國民黨政權的壓迫，每一位草擬「人權宣言」的牧長攏寫好自己的遺書，甘願背十字架面對苦難、犧牲甚至死亡，包括高俊明牧師亦是按呢，回憶錄第122頁咱通看見他的遺言！1999年4月18日佇立法院廣場，高俊明牧師引導在場參與「公投絕食活動」的台灣勇士做伙舉行主日禮拜，高牧師引用路加福音13章31-33節，鼓勵自己及每一位參與絕食的勇士，親像耶穌面對死亡的威脅，他勇敢回應講：「雖然是按呢，今仔日、明仔日，及後日，我一定著繼續行我的路，因為先知無應該佇耶路撒冷以外的所在互人刣死。」高俊明牧師跟隨耶穌基督甘願歡喜受苦，犧牲行十字架的路，這是今日咱真重要共同的信仰課題，一生盡忠打拚成做基督的門徒。

今日「北區大專事工紀念主日」，特別思念30年前(1991年5月8日)因為意外蒙主恩召，佇世間生活25年多的施俊哲弟兄，1992年2月出版的「天堂鳥的故事」充滿無數的感恩、思念的信仰見證，攏共同告白施俊哲弟兄一生怎樣「疼惜別人贏過自己」，他的生命時刻成做別人的祝福與盼望，他是台師長青團契的畢契，亦是此區大專事工的信仰見證，他真正活出「基督的門徒」生命展現的信心及盼望！

台灣基督長老教會大專事工亦造就培養真多願意一生服事上帝、服事人─「上帝的奴僕」！親像咱台北和平教會的楊博文牧師，他是淡江長青團契畢契，擔任過台北大專學生中心的工作者，現任咱教會成人牧養的事工！

願咱兄姊持續關心、支持，北區大專事工的推展，亦為北區大專事工需要的經費奉獻及代禱，願上帝賜福北區大專事工，造就閣卡多親像使徒保羅仝款勇敢用生命見證「恁著學我，親像我學基督。」(哥林多前書11章1節)的「基督門徒」！